- Ji hemû evînên bêwext re-
Heta tu bibêjî bes xedar in sînor
Kele kela laşan dinalin
Bo gewriyeke seranser têrarzû
Heta tu bibêjî bes
Sorsorik dipelikin
Ji ber bihareke bêwext
Heta tu bibêjî bes
Ax diçikçike
Ji ber germahiya kurewî
Heta tu bibêjî bes
Bi tenê me îşev
Min Haşim bire mala Cizîrî
Heyv li ser hawiz kizirî
Bi du quruş û nîvan
Hezn û daxê difroşe
Li ber dua û lavlavan
Di ber tiqetiqê fahîşeyekê re
Ayet û lawijên Îsa şeveder in
Sedeqeyên evîndarên bêmecal
Xenzîrok in di gewriya zarokeke desmalfiroş de
Hemû tolaz û serxweş
Tifî ser kîna Siyon dikin
Her ku bêmirazî dinuqite ser kortalihiyê
Nikarim bibêjim korîma ferîşteyan
Seranser jin difûre lewre
Ji cumle azayên min
Min îşev jî helbestek dizî
Ji boxçika xwedayê gewre
Zengîntir keya ez im
Li nav bexçeyê hunerê…!